Vraag: Ten spyte van al ons vryheid deesdae, word mense steeds ge-evalueer volgens hulle LEWENSTYL, nie waar nie? Hoe sou jy styl definieer?

Ferdi: Ja, ek vrees lewenstyl word nog te onmenslik bedryf in die gemeenskap, as 'n maatstaf om ander te beoordeel. Om so te maak word egter al meer gesien as slegte styl. En hopelik sal ons almal binnekort insien watter slegte styl dit is, om ons mede mense en diere te laat honger ly. Om jou ander vraag te antwoord - styl is mos maar onmoontlik om vas te pen. Dit is abstrak en persoonlik. Dis soos om sekere mense "stylvol" te noem. Wat is daardie kwaliteit van hulle? Ek weet nie - maar ek sien dit baie mooi, en geniet dit.

Dit sou beter wees om styl as 'n instrument te gebruik - 'n nuttige tegnologie - sonder om persoonlike waarde daarmee te verbind. Deur bestaande style te ondersoek kan jy uitvind waarvan jy hou. Dit maak keuses alreeds baie makliker. Kombineer dan hierdie style op 'n nuwe manier, om vars perspektiewe te skep. Die hart en verstand moet saamwerk. Kies style wat jou lewenswyse pas: 'n leefstyl wat jou ware

self weerspieël, in plaas van 'n pronkstuk wat direk uit 'n internasionale tydskrif kom - maar wat miskien nie jou persoonlikheid pas nie, of wat gewoon nie gerieflik gaan wees om in te leef nie. So skep jy eintlik 'n illusie. As jy jouself eerlik sou afvra waarvan jy hou, sou die resultaat 'n meer toepaslike interieur kon wees - of klerekas, motor, musiekversameling en so aan.

Vraag: Mens kan dus vryelik meng en pas?

Ferdi: Ja en nee. Daar is niks verkeerd mee om 'n spesifieke styl te kies en dit goed te doen nie. Die Toskaanse styl is op die oomblik baie gewild en as 'n styl is dit goed gevestig, met baie leidrade wat gevolg kan word. Maar 'n mens moet onthou dat die Toskaanse styl self (om dit as voorbeeld te gebruik) oor honderde jare ontwikkel het deur blootstelling aan ander kulture, wat met daardie streek in Italië in aanraking gekom het. Die Romeine het reeds noemenswaardige handel gedryf met Indië en Afrika. Die Toskaanse styl is dus alreeds 'n ryk samestelling van invloede, wat gegroei het tot die eiesoortige styl wat ons vandag ken.

Ek stel voor, gebruik speelse kontraste en ongewone kombinasies om iets uniek en individueel te skep, maar behou 'n diep gevoel van harmonie. Al die dele moet saamwerk om 'n naatlose geheel te vorm.

Hier kan die hulp van binnehuis-spesialiste baie nuttig wees: om aan kliënte die vrymoedigheid te gee om style opwindend te meng, maar om steeds daardie harmonie te bereik. Om eerlik te wees: as style nie heel versigtig gemeng word nie kan die resultaat oordadig en gefragmenteerd lyk. Aan die ander kant laat die "blinde" navolging van 'n spesifieke styl nie veel ruimte vir kreatiwiteit toe nie. Die groot ding is balans.

Vraag: Beskryf jou eie styl.

Ferdi: Dit word seker die beste opgesom deur die Arabiese spreuk: "Wanneer die woning klaar is, trek die dood in." 'n Huis moet altyd onvoltooid bly. Verandering is belangrik, in pas met die eienaars se veranderende smake en leefstyle. Anders kom die dood in: dus, mense se lewens kom maklik tot stilstand wanneer hulle omgewing nie "lewe" nie. Verskeie faktore beïnvloed die manier waarop huise ontwerp word. Die familie groei eers, dan later verlaat die kinders die huis. Mense begin van die huis af werk, die skaal en manier waarop hulle onthaal, verander. Smaak ontwikkel ook. Style wat tevore nie eens oorweeg sou word nie, kan later aanklank vind.

Ek benader versiering soos 'n verkleurmannetjie, altyd op soek na nuwe insette. Dit is belangrik vir my om in nuwe style te werk, want dis een manier om te groei in kuns. Lig en deursigtigheid is ander sleutel-elemente. Ek hou van glas en spieëls: Die maniere waarop spieëls lig weerkaats en glas dit opneem, amper asof die glas sy eie lig afgee. Interieurs behoort deur die natuur geïnspireer te word. My ideale binneruimte is 'n oop, solder-tipe vertrek, waar al die publieke dienste in een ruimte gekombineer word: sitkamer, eetkamer, kombuis en studeerkamer. Die vertrek moet heeltemal oopmaak op die tuin, met groot skuifdeure en/of vensters. Die binnekant word soort van minder belangrik as die buitekant. 'n Mens kan dus binne wees terwyl jy die konstante verandering kan waardeer wat buite in die natuur plaasvind: die geluid van die wind in die blare, die voëls in die bome, die verandering in die ligkwaliteit ens. Die teenwoordigheid van water is ook belangrik.

Dit het 'n koel effek in warm weer en die klank van water is kalmerend. Ander mense sien dit ook so - met gevolg dat die grense tussen huis en tuin oral begin om minder definitief te word.

Vraag : Dikwels lyk dit of jy jou sosiaal geroepe voel - met lewenstyl, van alles?

Ferdi: Verseker. Ek het al wyd in Afrika en Europa getoer, en verskillende kulture en metodes leer ken. Ek help nou mense, as my eerbare werk, om die slim idees wat ek daar gesien het, hier in Suid-Afrika toe te pas. Hulle leer graag van ons ook. Ons ontwerpers kry werk daar, en gaan wen selfs hulle grootste pryse.

Terug by die huis is ons vandag die mees gevorderde Grondwet en (van alle lande) die minste buitelandse vyande. Ons het die beste weer, geen ernstige aardbewings of orkane nie - noem maar op. Wat ons nog moet doen is om meer dankbaar te wees vir hierdie wonderlike Suid-Afrika en dit as ons tuiste te aanvaar, om burgers te word, om op te knap en in te trek. Ja, sommige van ons het baie rykdom om uit te stal. Ons moet daarna omsien, maar sien dit ook na ons om? - dit is die lewenstyl vraagstuk.

Begin tuis: maak jou huis 'n tuiste vir jou eie hart, denke en siel. Waarom daarsonder voortgaan? Enige tuiste is waardevol, en behoort tot die optimum gebruik te word, sodat dit die meeste vir ons kan beteken. Die regering doen goed, maar kan nie boonop ons lewenstyle vir ons ontwikkel nie - laat staan nog ons harte verander. Die wat weet hoe om 'n verskil te maak is maar steeds min, en moet nie hul plig versuim nie. Hierdie land kan een word wat goed is vir verliefdes, idealiste, kunstenaars, en selfs 'n hawe vir die met gebroke harte - 'n werklik beskaafde land.

· Kopiéreg © PULSE · Alle regte voorbehou · 
· E-pos · Verweb deur ·